Бурите Малик и Кори ја погодија Велика Британија и оставија без струја илјадници домови, а посебна опасност претставуваат и за воздушниот сообраќај, бидејќи авионите се соочуваат со силни налети на ветер, кои одат и до 200 километри на час.
Вештините на пилотите дојдоа до полн израз во случаите на слетување при екстремно силен ветер, снимени на аеродромот „Хитроу“ во Лондон и аеродромот во Манчестер.
На видеото од Лондон се гледа како авион на British Airways се приближува кон пистата и се спротивставува на силните налети на ветерот. Авионот успева да ја допре пистата со тркалата, но ветрот почнува да го ниша, до толку што за малку не удри во земјата со едното крило. Пилотот сепак одлучи да се откаже од слетувањето и го крена авионот за да се обиде повторно. Во таа прилика, како што може да се види на видеото, тој дури и малку ја изгреба пистата со задниот дел од авионот.
Од British Airways за британските медиуми изјавија дека авионот потоа успешно слетал и дека немало никакви проблеми со екипажот и патниците.
„Нашите пилоти се обучени да се справуваат со различни сценарија, вклучително и екстремни временски услови“, се вели во соопштението на British Airways.
Други снимки направени во Манчестер покажуваат дека повеќе авиони од различни авиокомпании го доживуваат истото како авионот во Лондон - силни налети на ветер што предизвикува некои веднаш да слетаат, други да се откажат додека силните ветрови ги носат лево-десно или горе-доле.
