Милан го потврди ангажманот на Фонсека

Златан Ибрахимовиќ на прес конференција потврди дека Португалецот Паулу Фонсека е новиот тренер на Милан. Набргу оваа информација беше објавена и на клупската веб-страница.

Фонсека во Милан дојде од Лил, со клубот од Милано потпиша 3-годишен договор, според кој ќе инкасира 9 милиони евра.

„Помеѓу Лопетеги и Фонсека од самиот почеток бевме наклонети кон доведување на Паулу. Разговаравме со Фонсека и му ги презентиравме нашите идеи и нашата стратегија. Тој има свои барања, идеи како индивидуално и колективно да го подобри тимот. Го имаме планирано и проектот У23, кој ни е многу важен. Фонсека е тренер кој ни дава шанса да развиваме млади играчи. Следната сезона ќе играме четири натпреварувања, клуб како Милан мора да има конкурентен состав за тренерот да си ја заврши работата. Мораме да му обезбедиме на тренерот најдобри можни услови“, изјави Ибрахимовиќ.

Фонсека добро знае како е да се работи во Серија А бидејќи во периодот од 2019 до 2021 година беше тренер на Рома.