Камерите успеаја да „уловат“ кралски бенгалски тигар кој талка низ шумата на надморска височина од 3.165 метри, што е најголема надморска височина на која досега биле забележани овие големи мачки во Непал, објави непалската државна Управа за шуми.
Тигарот случајно беше снимен двапати во ноември, со камера поставена да следи десет диви црвени панди опремени со GPS-сателитски околувратници во шума во источен Непал, се вели во соопштението на Управата за шуми.
Сонам Таши Лама, координатор на програмата „Мрежа на црвени панди“ (RPN), организација која се занимава со зачувување на овој вид панди, рече дека тој и неговите колеги биле изненадени бидејќи никогаш не биле забележани тигри на таа висина во Непал.
Откритието е многу возбудливо за научниците кои се залагаат за зачувување на животинските видови во Непал.
„За нас, ова е посебно откритие. Иако биле забележани тигри на поголеми надморски височини во Бутан, ова е посебно и ново откритие за нас, бидејќи никогаш не помислувавме дека тигар може да живее на такви височини и во Непал. Затоа треба да ја преиспитаме стратегијата за зачувување на овие големи мачки“, изјави Лама за Deutsche Presse-Agentur.
Кралските бенгалски тигри најчесто живеат во областа околу делтата на Ганг и нивните движења на поголема надморска височина се сметаат за многу ретки. На почетокот на оваа година, непалската Управа за шуми соопшти дека е забележан бенгалски тигар на надморска височина од 2.500 метри.
Експертите сметаат дека причина за преместување на тигрите во повисоките области може да бидат климатските промени, додека други сметаат дека е одговорен недостатокот на соодветно живеалиште и извори на храна во областа каде што живееле досега.
Непалските власти се обврзаа на заштита на бенгалските тигри и се близу до нивната цел - да го удвојат бројот на овие големи мачки на територијата на Непал до 2022 година.