По речиси 3 часа заврши финалното сослушување за случајот со капиталните добивки на Јувентус, обвинителството и одбраната ги имаа завршните зборови, а медиумите од Чизмата велат дека вечерва после 20 часот ќе биде изречена конечната пресуда.
Италијанската фудбалска федерација побара казна со одземање на 11 бодови од тековнава сезона, како и 8-месечна забрана за бавење со фудбал за седуммината поранешни одговорни лица во клубот кои уште по излегувањето на скандалот во јавност си однесоа оставки. Тоа се Павел Недвед, Паоло Гаримберти, Асиа Грациоли-Венје, Кетлин Мери Хјуз, Даниела Марилунго, Франческо Ронкаљо и Енрико Велано.
Ова е помала казна од првичната со 15 одземени бодови и 12 месеци за инволвираните лица, која Јуве ја обжали, по што предметот беше вратен на повторно разгледување, а бодовите моментално му беа вратени. Денеска во Федералниот суд за жалби федералниот обвинител Џузепе Кинè го одржа финалното рочиште, по што Судот сега треба да се изјасни за конечната казна.
Откако стигнаа информации за тоа каква казна е побарана за „Старата дама“, акциите на клубот нагло паднаа за 4,2% на италијанската берза Пјаца Афари.
Инаку, Јувентус вечерева игра натпревар од 36. коло во Серија А, а гостува на „Карло Кастелани“ кај Емполи.