Македонскиот капитен во интервју за хрватскиот Sportske Novosti проговори за пласманот во баражот, но и за политичката крижа во земјава кој очигледно допрела и до фудбалерите.
„Уште спијам, во кома сум!“, вака Ристовски го почнува интервјуто за хрватскиот медиум.
Стефан поради суспензија од жолти картони не настапи на онаа незаборавна победа од 5:0 кај Ерменија, но потоа се врати за одлучувачкиот натпревар со Исланд кој Македонија исто така успеа да го добие, со 3:1, и со тоа да го осигура второто место и пласманот во баражот.
„Македонија никогаш досега не била во ситуација да се бори за европски и светски првенства. Во групите во кои игравме обично освојувавме по 6-7 бодови. Но, во последно време сè се промени. Имаме профил на играчи кои сакаат да напредуваат, кои сакаат големи работи, постигнување големи цели. Успеавме да се пласираме на ЕУРО, а еве сега сме во завршницата од борбата за Светското првенство во Катар. Многу сум среќен поради тоа. Знаете, имаме квалитет, секој заслужува ваков успех“, вели тој.
Иако сите репрезентативци настапуваат во странски клубови, сепак неодамнешната политичка криза допрела и до нив. Ги погодува и се обидува да им ја наруши атмосферата, но не успеа, а Ристовски вели дека токму репрезентацијата го обединила народот и му донела неизмерна радост.
„Сигурно знаете каква е политичката ситуација во Македонија. Политиката постојано нѐ убива! Народот е постојано поделен. Во вакви лоши времиња нѐ обединува само спортот, а особено фудбалот. Затоа сум пресреќен затоа што во вакви тешки околности барем ние како репрезентација го развеселивме македонскиот народ. Мислам дека не е претерување да се каже дека нашата репрезентација го обедини македонскиот народ! Колку-толку...“, смета капитенот, кој слично кажа и на пресот по натпреварот.
Сега следува репрезентативна пауза до март. Но, прво наредниот петок ќе видиме кој ќе ни падне во жрепката, а потоа во март Македонија ќе се бори за пласман на прв, историски Мундијал.
„Ги имаме уште тие два натпревара... Мислам дека е можно да одиме во Катар, сите веруваме во тоа. Има еден проблем, поради жолти картони нема да можеме да играме со Елмас. Но, ќе ни се врати Аријан Адеми, кој многу ни значи. Само да бидеме живи и здрави до баражот, тогаш многу е можно по ЕУРО да се пласираме и на Мундијал“, заврши Ристовски.
