Ако живо се сеќавате на 90-тите и уште си мислите дека биле пред 10 години, неизбежно сте го фатиле ТВ-феноменот наречен „Friends“. Серијата важи за една од најгледаните на сите времиња, а нејзините ликови за безвременски.
Но, новата генерација млади луѓе кои прв пат ја гледаат мега популарната серија за која своевремено се сметаше дека ги поместува границите и зборува на теми што до тогаш биле табу, сметаат дека „Friends“ не само што не е смешна, туку е и навредлива.
Омилените пријатели за генерации луѓе, Моника, Рејчел, Рос, Чендлер, Фиби и Џои, беа во нивните 20-ти и 30-ти додека се емитуваше серијата. Нивните проблеми и размислувања беа во тек со модерното време тогаш и ја засмеваа публиката со досетливите коментари, но денешните млади луѓе се далеку од импресионирани.
Писателката Ребека Рејд вели дека не ѝ се верува колку лошо остарела серијата.
„Неверојатно високо ниво на хомофобија, врвот на секоја шега за Рос е дека неговата поранешна сопруга е лезбијка, дека и тоа е негово ‘промашување’ и дека е пресмешно што го оставила за жена“, вели таа.
„А да не почнувам за сексизмот и притаениот расизам: тое е една од ‘најбелите’ серии што некогаш постоеле.“
Таа сепак вели дека имало делови што ѝ се допаднале и дека зема предвид дека тие сценарија биле пишувани во друго време за кое нејзината генерација само има слушнато.
ТВ-критичарот Мајк Ворд застанува во одбрана на популарната ТВ-серија.
„Ако не ви е пријатно да го гледате тоа, зошто го гледате?“, вели тој и додава дека критиките против „Friends“ се „беда и очај“.
„Мора да пристапиме на ова како возрасни, да ја согледаме перспективата и контекстот во кој настанала серијата. Во ред е да кажеш дека серијата прави да ти биде непријатно согласно денешните стандарди, но всушност вие го гледате светот низ една многу тесна призма.“
