Многу веројатно е дека Роберто Манчини нема да добие отказ од селекторското столче на „Аѕурите“, па ќе може да направи ремонт на тимот кој ќе треба да ја одбрани титулата европски шампион во 2024 година.
Шокантниот пораз од 0:1 од Македонија во четвртокот го сруши сонот на Италија за освојување на титулата светски шампион веднаш после покорувањето на Стариот континент. Втор пат по ред „Аѕурите“ ќе пропуштат Мундијал откако исто така во бараж загубија и на патот кон Русија 2018, тогаш од Шведска.
И додека репрезентацијата се подготвува за вечерашниот пријателски натпревар со Турција, кој ќе биде тежок за играње со оглед на тоа што претставува дуел на две репрезентации поразени од мундијалските баражи, сѐ уште се поставува прашањето дали Манчини ќе остане на клупата или ќе си замине.
Доколку Манчини остане, а веројатноста за тоа е голема бидејќи и покрај елиминацијата од „Рисовите“ ја има поддршката на ФИГЦ, во тој случај новата Италија ќе биде предводена од тројца играчи.
Централниот 22-годишен дефанзивец на Интер е физички силен и тактички надарен бек, висок 190 сантиметри кој поседува експлозивна брзина кога е потребно. Сезонава е стартер кај Симоне Инѕаги и ниту еднаш не потвфрлил.
Бастони е очигледен избор за подмладувањето на одбраната со оглед на тоа што на ветераните Џорџо Кјелини и Леонардо Бонучи им е време да заминат од репрезентацијата, или најмногу да имаат улога на резервисти. Зрелоста на младиот Бастони и речиси никаквата историја на повреди наговестува дека тој ќе биде бедемот пред италијанскиот гол во наредната деценија.
Неверојатно интелигентниот дефанзивен играч од средниот ред на Милан се истакнува со квалитетно и паметно позиционирање без топка и прецизни долги додавања. Овој 21-годишник многу наликува на Андреа Пирло по физичкиот изглед, а по начинот на игра личи на Џенаро Гатузо со оглед на тоа што не се плаши да стави глава онаму каде што многумина не би ставиле нога.
На Тонали сѐ уште му е потребно време да се развие и да созрее, а неуспехот на Италија да се пласира на Мундијалот значи дека има уште две години време да се развива пред наредното големо натпреварување.
Играчот кој јавноста сакаше да го види како стартер против Македонија, а кој Манчини го изостави. Има 23 години, игра за Сасуоло, а и покрај тоа што е висок 195 сантиметри е изразито агилен и брз. Често го споредуваат со Златан Ибрахимовиќ, делумно поради неговата импресивна техника.
Скамака е сестран напаѓач кој може да ја задржи играта, да трча странично, да се отвори во длабочина и да чека асистенција, едноставно се прилагодува на тоа што ситуацијата во која се наоѓа во моментот го бара. Иако сѐ уште е рано да се каже, возбудлива е самата замисла дека Скамака ќе биде голгетерот кој Италија со години го чека.
