Членки на рускиот бенд „Пуси рајот“ се приведени во неделата откако се обиделе да упаднат на терен на финалето на СП во Катар, во знак на протест против војната во Украина, затворањето на Алексеј Навални и угнетувањето на жените во Иран, пренесе Reuters.
Според добротворната организација Cinema for Peace, со седиште во Берлин, притворена е Ника Никулшина - членка на бендот, активистот Петер Верзилов и уште една членка на бендот од Украина.
Активистите биле запрени од припадници на безбедносните служби пред да успеат да влезат на теренот, стои во соопштението на Cinema for Peace.
Активисти на „Пуси рајот“ накратко го прекинаа финалето на СП во 2018 година, кога упаднаа на терен за да го свртат вниманието на кршењето на човековите права во Русија.
На финалниот натпревар меѓу Франција и Хрватска, кога рускиот претседател Владимир Путин одлучи да се појави на трибините, се случи единствениот инцидент на теренот што ќе остане како дамка во беспрекорната организација на Русите.
Три жени и еден маж од панк групата „Пуси рајот“, облечени со лажни полициски униформи, втрчаа на терен на почетокот на второто полувреме, додека Путин и останатите високи гости беа на стадионот „Лужники“.
За потсетуваање, токму организацијата Cinema for Peace го однесе Навални од Русија во Берлин на лекување во 2020 година кога беше отруен и со тоа му беше спасен животот.
