Кавадаречката гордост, ФК Тиквеш, испиша историја откако за прв пат во својата 94-годишна историја освои куп титула откако во големото финале со 2:1 ја совлада охридска Воска Спорт на Националната Арена „Тодор Проески“ во Скопје.
Откако по првите половина час играта беше главно досадна, Тиквеш се разигра кога со закаснување на Север влезе навивачката група Лозари и ја запали атмосферата.
Понесени од моментумот, кавадарчани создадоа неколку шанси пред противничкиот гол, а Едиз Спахиу ја погоди и пречката. Резултатот конечно беше отворен на 4 минути пред паузата кога Кристијан Стојкоски со мајсторија од слободен удар го совлада одличниот Костадин Захов.
Стратегот на охридската клупа, поранешниот македонски репрезентативец Срѓан Захариевским, на паузата направи три измени со цел да гио разбуди својот тим кој делуваше инертно. Сепак, тоа не се случи. Во 59. минута по еден корнер најдобро се снајде Бразилецот Луан Сантус Силва, кој донесе дуплирање на водството за Тиквеш.
Охриѓани се вратија во игра со голот на резервистот Николче Шаркоски во 77. минута, но и тоа не беше плод на некоја конкретна акција, туку по грешка на словенечкиот голман Ариан Ренер.
До крајот Тиквеш успеа да ја сочува предноста иако Воска Спорт нападна. Кавадарчани на крајот бурно прославија со своите навивачи и симпатизери, кои ја наполнија северната трибина. На Север беа симпатизерите на Воска Спорт, кои на моменти се трудеа да дадат поддршка на својот тим, но сеа многу помалубројни од кавадарчани, што и беше очекувано со оглед на тоа што овој тим доаѓа од населбата Воска во Охрид.
Со освојувањето на Купот кавадарчнани не само што ќе го однесат пехарот во Кавадарци, туку на лето и за прв пат ќе заиграат интернационално бидејќи како куп победници добија место во квалификациите за Конференциската лига на УЕФА.
