Девојката која тврди дека е исчезнатата Меделин Мекен доби резултати од ДНК тестот

Полјачката која во изминативе месеци се најде во центарот на вниманието на европската и светската јавност бидејќи тврдеше дека е исчезнатото девојче Меделин Мекен, конечно ги доби резултатите од ДНК тестот, пренесуваат светските медиуми.

Јулија Фаустина, која се претставува и како Јулија Ванделт, пред неколку месеци излезе во јавноста со тврдења дека таа е Британката Мекен која исчезна од португалско одморалиште во 2007 година.

Нејзината портпаролка Фиа Јохансон денеска на својот официјален профил на Instagram го објави резултатот од ДНК тестот за потекло.

„Иако е невозможно да се каже со сигурност без ДНК резултатите на родителите од двете страни, резултатите од тестот зборуваат за корените на Јулија. Тестот покажа дека таа има 100 проценти полско потекло, со занемарливо литванско и руско влијание. Резултатите од ДНК тестот не покажаа никаква поврзаност со британски, па дури ни со германски корени“, рече таа, пренесува Sky News Australia.

Да потсетиме, Полјачката излезе во јавноста бидејќи не го знаела сопственото потекло, тврдејќи дека и самата имала трауматични искуства во детството и дека не е сигурна дека навистина е крвно поврзана со семејството со кое живее.

Мекен исчезна кога имаше три години за време на семеен одмор во Португалија во 2007 година, но случајот сè уште не добил епилог.