Биологот Томас Јунг видел исклучително ретка глетка на 29 август 2020 година, во близина на градот Вајтхорс во Јукон, Канада. За среќа, тој успеа брзо да го извади мобилниот телефон и да го сними првото видео од црн канадски рис (Lynx canadensis).
Овие големи мачки обично имаат сребрено-сиво крзно во текот на зимските месеци, а црвено-кафеаво во текот на летните месеци.
„Има само мал број записи за полиморфизми на влакното во родот рис. Прилагодливото значење на меланизмот кај рисот моментално е непознато“, напиша Јунг од Одделот за животна средина во Јукон во студијата.
„Имаше црно крзно со белузлаво-сиви заштитни влакна“
Црниот канадски рис потешко се камуфлира при лов, а тоа е најверојатната причина зошто ги нема толку многу во дивината.
Јунг го набљудувал животното од далечина од околу 50 метри. На рисот изгледа не му пречело присуството на луѓе. На видеото се слуша и лаење на куче, што можеби ја натерало големата мачка на крајот да ја напушти областа.
Со оглед на тоа дека „средбата“ меѓу биологот и рисот траела прилично кратко, експертите не можеле да направат детална анализа на бојата на влакното на ова животно врз основа на видеото, но неколку од нив потврдиле дека навистина се работи за канадски рис, пишува Science Alert.
„Тој имаше црно крзно со белузлаво-сиви заштитни влакна, како и белузлаво-сиви влакна на лицето и пределот на муцката“, изјави Јунг.
Иако не е забележана значајна варијација во бојата на влакното кај канадскиот рис, крзното на некои други видови, вклучувајќи мечки и волци, може да биде неверојатно разновидно. Како и кај канадскиот рис, се смета дека бојата на влакното е поврзана со тоа како животните бараат храна, или можеби помага да се излади или загрее телото.
Реакција на промени во околината
Анализирањето на опсегот на можни бои кај популацијата на цицачи може да им помогне на научниците да следат како еден вид реагира на промените во животната средина.
„Поради зголемениот број којоти, кои се конкуренција за лов на плен, и помалку снежни врнежи поради климатските промени, намалувајќи ја ефективноста на камуфлажата на црниот рис, веројатноста за адаптација на канадскиот рис со меланизам се намалува“, пишува Јунг.
Истражувањето Paint it black: first record of melanism in Canada lynx (Lynx canadensis) беше објавено во списанието Mammalia.
