Руските програмери лансираат клон на социјалната мрежа Instagram наречен Россграм откако во земјата беше забранета познатата американска апликација за споделување фотографии.
Според веб-страницата, Россграм треба да биде лансиран на 28 март за инвеститорите, спонзорите и медиумите, пред да се отвори за блогерите и другите корисници.
„Мојот партнер Кирил Филимонов и нашата група на програмери веќе беа подготвени за ваков развој на настаните и решија да не ја пропуштат можноста да создадат руска верзија на популарната социјална мрежа што ја сакаат нашите сонародници“, напиша Александар Зобов, коосновач на апликацијата, на социјалната платформа ВКонтакте, пренесува Reuters.
Россграм изгледа многу слично во дизајнот на Instagram - сѐ до боите на логото - следејќи ги фотографиите на неговата страница.
„Россграм е нова социјална мрежа со познат и разбирлив интерфејс, богати функции и едноставни услови за работа“, стои во објаснувањето на страницата.
Instagram беше исклучително популарен во Русија и клучен извор на приходи за многу мали бизниси и блогери, пишува NBC News. Сепак, Русија ја забрани апликацијата од 14 март, по потегот на земјата да ја прогласи матичната компанија на платформата за „екстремистичка организација“ според руските закони.
Неколку руски инфлуенсерки останаа во солзи кога минатата недела се збогуваа со своите милиони следбеници на интернет.
Русија претходно претстави голем број имитирани верзии на западни брендови откако компаниите ја напуштија земјата под закана од санкции. На пример, рускиот синџир за брза храна наречен Вујко Вања објави лого што потсетува на познатиот McDonald's.
