Германскиот весник Frankfurter Allgemeine Zeitung во ново истражување пишува за популарноста на руската вакцина Спутник V, која од недела во недела станува дел од програмата за вакцинација во сè повеќе земји низ светот.
FAZ наведе дека руската вакцина е регистрирана во 38 земји. Руската вакцина стана особено популарна меѓу условно кажано посиромашните земји бидејќи дозите се прилично евтини бидејќи може да се добијат двете дози за помалку од 20 долари.
Весникот пишува дека руската вакцина е ценета и меѓу научниците, а доволен доказ за тоа е и тврдењето на The Lancet, стручно списание кое потврди дека се работи за ефикасна вакцина.
FAZ во текот на анализата го поставува прашањето дали навистина постоеше потреба за скептицизам за оваа вакцина. Скептицизмот особено се однесува на западните земји кои и понатаму имаат недоверба во Спутник V.
Сомнеж во руската вакцина неодамна изрази и Урсула фон дер Лајен, претседателката на Европската комисија, која изрази изненадување на фактот дека Русија нуди милиони дози на други држави додека кампањата во матичната држава и понатаму стои во место. Од Русија на ова прашање одговорија дека прашањето за вакцината не смее да се политизира.
Руската вакцина не е одобрена на подрачјето на Европската Унија. За нејзино одобрување надлежна е Европската агенција за лекови (ЕМА) која пред одобрувањето мора да изврши неколку испитувања.
„Мора да се достават сите податоци за пациентите од студии и да се прегледаат производните погони. Покрај тоа, ЕМА сега бара податоци за ефикасноста на вакцината против новите мутации. Според Гамалеја, руската вакцина би требало да помогне против британскиот и јужноафриканскиот сој. Меѓутоа, податоци за тоа сè уште не се објавени“, стои во анализата на FAZ.
Германскиот весник нагласува дека досега само 2,7 проценти од популацијата во Русија примиле барем една доза од вакцината. Заклучокот на FAZ е дека граѓаните и понатаму имаат мала доверба во вакцината.
