Последните истражувања покажаа дека вакцината од британско-шведската компанија AstraZeneca драстично го намалува ширењето на коронавирусот, пренесе New York Times.
Според британските власти, резултатите покажуваат дека масовната вакцинација е клуч за запирање на пандемијата на коронавирусот.
Вакцината со заеднички напори е развиена од AstraZeneca и Универзитетот Оксфорд, а не само што ги штити луѓето од сериозни болести и смрт, туку и драстично го намалува пренесувањето на коронавирусот.
Податоците од новото истражување ја акцентираат важноста на масовната вакцинација со цел да се стави крај на пандемијата. Истражувањето е спроведено од научници од Оксфорд и претставува првиот документиран доказ дека вакцината може да го намали пренесувањето на вирусот.
Научниците го анализирале влијанието на пренесувањето така што ги тестирале учесниците секоја седмица да бараат знаци на вирусот. Доколку вирусот не бил присутен меѓу учесниците во истражувањето дури и ако некој бил заразен, тогаш тоа е показател дека не можел да се шири.
Според резултатите, вакцината може да го намали пренесувањето на вирусот за две третини.
„Сега знаеме дека вакцините го намалуваат пренесувањето на вирусот и дека ќе ни помогнат да излеземе од оваа пандемија. Резултатите треба да ги уверат сите дека вакцината ги прави безбедни, но и дека со тоа ќе се спречи пренос на вирусот на други луѓе“, изјави за BBC британскиот министер за здравство Мет Хенкок.
Научниците заклучиле дека една доза од вакцината има ефикасност од 76 проценти во спречување на вирусот. Податоците се собрани во период од три месеци по давање на првата вакцина, освен тринеделниот период потребен заштитата да има ефект.
Овие податоци не можат да се генерализираат и не се однесуваат на други вакцини.