Нов предводник на Барселона ќе биде германскиот стратег Ханси Флик. Ова го тврди угледниот шпански весник AS.
Според нивните информации, спортскиот директор на Каталонците, Деко, како и членот на спортскиот дел од менаџментот, Бојан Кркиќ Перес, изминативе денови биле во Лондон каде се сретнале со агентот на германскиот стратег, Пини Захави, и практично ги договориле сите детали околу неговиот ангажман.
Во Барселона се воодушевени како Баерн изгледаше додека на клупата седеше Флик, а особено што под негово водство баварскиот гигант му го нанесе еден од најтешките порази во историјата на Барса, оној од 8:2 во Лигата на шампионите.
Според AS, останува уште само претседателот Жоан Лапорта да се сретне со актуелниот тренер Чави Ернандес за да се стави крај на неговиот работен ангажман во Барса.
Шпанскиот весник наведува дека е постигната согласност договорот да биде потпишан на две години, а доколку резултатите во тој период бидат задоволителни ќе има можност истиот да се продолжи.
59-годишниот Ханс-Дитер Флик последно беше селектор на Германија од каде беше отпуштен на 10 септември лани по 4:1 дебаклот на пријателска против Јапонија. Германија ја водеше две години, а претходно исто толку го водеше Баерн. Пред тоа кратко работеше како асистент и спортски директор во Салцбург кај Џовани Трапатони и Лотар Матеус, а од 2006 до 2017 му беше прво асистент на Јоахим Лев во репрезентацијата на Германија и потоа спортски директор на истата.