Пензиониран кинески војник безвременските денови ги минува тренирајќи ја својата мачка да изведува акробации и потези карактеристични за оние тренирани воени и полициски кучиња.
Јоу Гуопин живее во селото Сјанпози во близината на кинеската престолнина Пекинг.
Неговата мачка по име Ганбен, што значи „монета“ на мандарински, сега се обучува да избршува специјални задачи како да е дел од војска.
Тој често ги снима тренинзите и видеата ги поставува на социјалните мрежи, по што стана популарен во Кина. Но, не сите се воодушевени од неговите постапки.
„Многумина мислат дека ја терам на сила мачката да тренира, а некои дури и велат дека сум ја тепал за да ме слуша. Напротив, тој метод е тотално неупотреблив кај мачките бидејќи за мачка да ве слуша треба да ја убедите во тоа“, вели Јоу.
„Нормално е да се добијат и позитивни и негативни критики, сѐ додека во моето срце сум сигурен дека не ја злоупотребувам мачката“, додава.
Јоу чува и куче, а често и него го тренира. Според видеата, изгледа како и двете животни да уживаат во тренинзите на Јоу, како и во друштвото едно на друго.
„Мислам дека мачката е таа која најмногу ми прави мерак. Без нејзиното разбирање мислам дека не би можел да ги изведувам овие тренинзи, така да морам нејзе да ѝ се заблагодарам“.
Тој во армијата имал задача да тренира армиски кучиња, така да има вештини за работа со животни. Сепак, никогаш претходно не тренирал мачка.
„Тешкото во тренирањето мачка е тоа што нејзината стабилност е многу ниска, тоа е првиот проблем. Вториот е тоа што нејзината издржливост и физичката способност ѝ се исто така на ниско ниво, и како трето, мачките многу лесно се деконцентрираат. Воопшто не е лесно да успеете на мачка да ѝ го задржите вниманието“, објаснува Јоу.
